Os operarios traballan na reparación do paseo entre Praia América e Panxón tras os danos dos temporais

Os temporais rexistrados nas últimas semanas deixaron importantes danos no paseo marítimo e na pasarela de madeira que une Praia América con Panxón, un dos tramos máis transitados da costa de Nigrán.

A forza do mar e do vento provocou o deterioro de parte do entramado da pasarela, así como problemas nas instalacións eléctricas da zona, visibles ao longo de varios puntos do percorrido.

Durante a xornada de hoxe, operarios desprazáronse ata o lugar para iniciar os traballos de reposición do sistema eléctrico afectado e para avaliar e tentar solucionar parte dos danos estruturais ocasionados polo temporal.

As actuacións céntranse tanto na seguridade da infraestrutura como na recuperación progresiva do paseo, co obxectivo de devolver a normalidade ao tránsito peonil canto antes.