O concello de Gondomar prevé iniciar antes do verán as obras para frear as riadas

O Concello de Gondomar prevé iniciar antes do vindeiro verán as obras do plan destinado a poñer fin ás recorrentes riadas que afectan ao centro urbano e á parroquia de Mañufe. O anuncio chega tras pechar, por fin, un acordo coa Xunta de Galicia despois de tres anos de desencontros entre ambas administracións.

Segundo fontes consultadas, a intención inicial do alcalde, Paco Ferreira, era presentar o acordo antes de Nadal. Porén, a complexidade técnica da actuación e as negociacións sobre o impacto no tráfico atrasaron o anuncio, que agora se acompaña dun calendario máis definido.

A intervención, impulsada por Augas de Galicia, contará cun orzamento próximo aos 3,5 millóns de euros, practicamente o dobre do plan adxudicado en 2022 por 2 millóns, que foi finalmente descartado polo rexeitamento municipal a que o tráfico se desviase polo corazón do casco urbano e pola humanizada Praza da Paradela.

A solución consensuada pasa pola construción dun vial e unha ponte provisionais, paralelos á avenida Curros Enríquez, que permitirán manter a circulación mentres duren unhas obras que se prolongarán, cando menos, durante un ano. O acordo inclúe tamén melloras na contorna da estación de autobuses e a substitución das pontes da Coelleira e As Cercas.

O goberno local confía en que esta actuación marque un punto de inflexión fronte a un problema histórico que cada inverno volve poñer en risco Gondomar.