Bolos da Carrasca e Mulleres Rurais San Benito, no programa +Convivencia da Deputación

A Deputación de Pontevedra vén de aprobar o listado de entidades admitidas no programa +Convivencia, dotado este ano con 300.000 euros, 25.000 máis que en 2025. A iniciativa chegará a 114 asociacións de Vigo e do sur da provincia co obxectivo de fomentar o ocio compartido e a participación social.

O presidente provincial, Luis López, destacou que o programa busca “estar ao carón das entidades sociais” e promover espazos de encontro e convivencia, ademais de divulgar o patrimonio cultural e natural.

Na comarca do Val Miñor, en Nigrán resultou beneficiado o Centro Cultural y Deportivo Bolos da Carrasca, mentres que en Gondomar participa a asociación Mulleres Rurais San Benito.

No Baixo Miño, en Oia recibirán apoio a Asociación Mulleres Rurais de Oia e a Asociación Veciñal Socio-Cultural e Deportiva Santa Eugenia de Mougás. Pola súa banda, en Tomiño está incluída a Asociación Cultural Deportiva Recreativa Colibrí.

O programa +Convivencia, que o ano pasado beneficiou a unhas 15.000 persoas en 56 concellos, promove actividades que favorecen o intercambio de experiencias e a dinamización social a través de iniciativas culturais e de lecer.