O que foi alcalde de Baiona Luis Carlos de la Peña publica “Campos do desafío”, unha recompilación de artigos e perfís da cultura galega

O escritor eibarrés Luis Carlos De la Peña, que foi alcalde de Baiona entre 2003 e 2004, publica Campos do Desafío, un volume que reúne artigos aparecidos no xornal La Región, nos que combina a análise cultural co retrato de figuras destacadas de Galicia.

A obra inclúe textos dedicados a nomes como Carlos Casares, Chus Pato ou Xaime Quessada, nos que mestura a semblanza biográfica co comentario persoal e a lectura do contexto cultural.

De la Peña iniciara a súa traxectoria literaria con El plumaje del tamarindo (2008), seguida de títulos como Notas de Madrid, Esa manía de ordenar el caos ou Papeles de Loureiral. En 2021 publicou El pintor Rafael Alonso en el Parador de Baiona, centrado no artista Rafael Alonso, e en 2023 El ruido de mis pasos, un percorrido cultural entre o Bidasoa e o Miño, ao que se suma tamén La belleza sin testigos.

Con esta nova publicación, o que fora rexedor de Baiona continúa unha traxectoria centrada na recuperación de perfís culturais e na vontade de dar forma literaria a lecturas, experiencias e paisaxes ligados a Galicia.