Baiona recibe 152.000 euros da Deputación para a substitución do céspede do campo do Aral

A Deputación de Pontevedra aprobou un investimento de 580.000 euros para a mellora de instalacións deportivas nos concellos de Baiona, Mos e Redondela no marco do Plan Extraordinario de Infraestruturas Deportivas (PEID).

O presidente provincial, Luis López, explicou que as achegas permitirán financiar actuacións en tres equipamentos clave: o campo de fútbol do Aral en Baiona, o campo de fútbol de San Antoíño en Mos e o pavillón municipal de Reboreda en Redondela.

En Baiona destinaranse 152.000 euros á substitución do céspede artificial, mentres que en Mos se investirán 170.000 euros para a reforma integral do campo de San Antoíño, que inclúe novo céspede, drenaxe, iluminación LED e melloras no contorno. Pola súa banda, Redondela recibirá 257.000 euros para a modernización do pavillón de Reboreda, con renovación de pista, vestiarios, accesos e instalación eléctrica.

Segundo destacou a Deputación, o obxectivo do PEID é dotar aos concellos de menos de 50.000 habitantes de infraestruturas deportivas modernas e seguras que favorezan tanto a práctica deportiva de base como a competición federada.