A regata de gamelas abre este venres as festas da Anunciada en Baiona

Baiona dará este venres, 31 de xullo, o pistoletazo de saída ás festas patronais na honra da Virxe da Anunciada coa celebración da tradicional Regata de Gamelas, Gran Premio Eurored – Xunta de Galicia\. A proba, única destas características que se celebra a nivel nacional, terá como escenario a baía da vila e volverá converterse nun dos grandes símbolos da identidade mariñeira do municipio\.

A presentación oficial contou coa presenza do alcalde de Baiona, Jesús Vázquez Almuiña; do delegado territorial de Deportes da Xunta de Galicia, Daniel Benavides; do director de operacións de Eurored, Raúl Costas, e dos concelleiros responsables das áreas de Deportes e do Mar\.

A regata é moito máis ca unha competición deportiva\. As gamelas, embarcacións tradicionais de madeira empregadas durante séculos polos mariñeiros nas súas tarefas diarias, regresan ás augas para render homenaxe á historia e ao patrimonio marítimo de Baiona.

Desde o Concello e a organización fan un chamamento á veciñanza e aos visitantes para participar nesta celebración, ben subindo ás gamelas ou animando desde a costa\. O obxectivo é manter viva unha tradición única e favorecer o seu relevo xeracional coa implicación das novas xeracións.

O alcalde, Jesús Vázquez Almuiña, destacou que “as nosas tradicións só seguen vivas se a xente as fai súas” e animou a toda a cidadanía a participar e demostrar, un ano máis, que Baiona “coida e celebra as súas raíces”.

O Gran Premio Eurored – Xunta de Galicia volverá ofrecer un espectáculo ligado ao mar, combinando o esforzo dos remeiros co ambiente festivo que caracteriza a vila\. Con esta cita, Baiona inicia oficialmente os días grandes das festas da Virxe da Anunciada.