Manifesto Miñor impulsa en Chantada a constitución de Agora Galicia cara ao 2027

A localidade de Chantada será o vindeiro 25 de abril escenario dunha xuntanza clave para o municipalismo galego, na que arredor de 40 candidaturas autoxestionadas se reunirán para constituír formalmente Agora Galicia, un proxecto orientado a coordinar iniciativas locais e preparar o camiño cara ás eleccións municipais de maio de 2027.

Impulsada por colectivos como Manifesto Miñor, a convocatoria está aberta tanto a grupos xa constituídos —algúns con representación institucional— como a persoas interesadas en promover novas candidaturas nos seus concellos. O encontro desenvolverase pola mañá no Casino de Chantada.

Agora Galicia preséntase como unha rede diversa de proxectos locais que busca fortalecer a cooperación entre iniciativas municipalistas mantendo a autonomía das asembleas de base. Entre os seus obxectivos figura a creación dunha confederación asentada no territorio e a coordinación estratéxica de cara ás eleccións de 2027, especialmente para incrementar a presenza nas deputacións provinciais.

Desde 2025, os colectivos implicados avanzaron na posta en marcha de ferramentas comúns, como asesoramento xurídico e apoio comunicativo, ao tempo que ampliaron a rede a máis localidades galegas.

Nun contexto internacional marcado pola incerteza, as entidades promotoras subliñan a necesidade de reforzar candidaturas de base como instrumento para facer fronte ao avance da ultradereita e promover un modelo social máis xusto e democrático desde o ámbito local.