Detido en Pontevedra o presunto autor do accidente que custou a vida a un motorista de O Rosal

A Garda Civil detivo na tarde de onte a un mozo de 25 anos, natural da Rexión de Murcia, como presunto responsable do accidente no que faleceu o rosaleiro Brais Otero, de 33 anos, a pasada fin de semana na estrada que conecta A Guarda con Goián.

O arrestado, que se atopaba en Pontevedra no momento da súa detención, levaba en paradoiro descoñecido desde o día do sinistro. Tras o impacto frontal co motorista, o mozo abandonara o lugar deixando o coche –un BMW con matrícula alemá– na estrada, e marchara supostamente nun vehículo que se parou a auxilialo, alegando que necesitaba atención médica. Desde entón, nada se soubo del ata a súa localización este luns.

Axentes do GIAT (Grupo de Investigación e Análise de Tráfico) da Garda Civil puxeron en marcha un operativo de seguimento que incluíu a revisión de cámaras de seguridade, testemuños e colaboración coa Policía Local de Tui e mesmo coa GNR portuguesa, ante a hipótese de que puidese cruzar a fronteira.

A investigación permitiu reconstruír o traxecto do BMW, detectado primeiro na PO-552 á altura de Oia, circulando a gran velocidade e realizando manobras perigosas. Nese traxecto, segundo varios testemuños, xa estivo a piques de provocar outro accidente antes de colidir finalmente coa moto de Brais, que morreu no acto.

Ao detido impútanselle os delitos de homicidio por imprudencia grave, conducción temeraria e omisión do deber de socorro. Está previsto que pase hoxe a disposición xudicial no Xulgado de Instrución de Tui.

A familia de Brais, moi coñecida no Rosal, agarda que se faga xustiza mentres a comarca continúa consternada pola traxedia.