O concello de Nigrán recibirá aos peregrinos con ‘doces sorrisos’ grazas ás chuches inclusivas de Minimelis

O Concello de Nigrán aposta por unha acollida diferente e inclusiva aos peregrinos do Camiño Portugués pola Costa: repartiralles 15.000 gominolas sen azucre, sen glute, sen lactosa e aptas para veganos elaboradas pola empresa local Minimelis. O lema da campaña é “Doces Sorrisos” e o agasallo distribuirase nas oficinas de turismo e no quiosco da Ramallosa.

O alcalde, Juan González, destacou que o obxectivo é “resultar un municipio amigable cos peregrinos, darlles a benvida dun xeito diferente para que se sintan especialmente ben coidados en Nigrán, que nos recorden como un lugar amable a onde regresar”. O rexedor puxo tamén en valor o carácter inclusivo das chuches de Minimelis, empresa asentada en Porto do Molle con recoñecemento internacional.

“Abriron o mundo das gominolas a persoas que non podían comelas por razóns de saúde ou crenzas, por iso chamámoslle chuches inclusivas. É moi relevante para unha crianza con diabete, por exemplo, poder participar plenamente nun aniversario”, subliñou González. Ademais, dous dos 25 traballadores de Minimelis proceden do CEE Juan María, feito que o Concello tamén puxo en valor.

O quiosco da Ramallosa, xestionado por usuarios do CEE Juan María e reaberto en abril, forma parte desta campaña de acollida. Alí, ademais de selar credenciais e ofrecer información turística, tamén se repartirán os doces.

Esta iniciativa súmase a outras medidas do Concello para mellorar a experiencia dos peregrinos. A principios de ano presentouse a web www.caminonigran.com, con información xeolocalizada sobre o percorrido oficial do Camiño, variantes, lugares onde comer, durmir, fontes públicas ou o estado das mareas, especialmente útil na opción máis litoral. Tamén se ofreceu formación en inglés básico para persoal da hostalaría local.

Segundo datos da Oficina de Turismo de A Ramallosa, entre o 12 de xuño de 2024 e o 31 de xullo foron atendidos 1.190 peregrinos de 37 nacionalidades diferentes. Estados Unidos encabezou a lista con 142 visitantes, seguido de Alemaña (87), Polonia (59) e Australia (32). Tamén houbo peregrinos de lugares tan diversos como Bielorrusia, Corea do Sur, Nova Zelandia, Brasil, Xapón, Turquía, Israel ou Malaisia.

“Todas estas iniciativas contribúen a construír unha imaxe hospitalaria de Nigrán. Animamos aos peregrinos a regresar ex-profeso noutra viaxe ao tempo que promocionamos o noso comercio local”, concluíu o alcalde.