Freiría e Kopa, dous valmiñoreses entre os 50 mellor valorados da Terceira División

O fútbol do Val Miñor está de celebración. Miguel Freiría, de Gondomar, e Antón Iglesias “Kopa”, de Baiona, veñen de ser recoñecidos entre os 50 mellores xogadores da Terceira Federación Galega, segundo o prestixioso portal La Preferente, que cada tempada publica esta clasificación baseada no rendemento e impacto dos futbolistas na competición.

Miguel Freiría, dianteiro do Valladares, nado en 1999, asinou unha tempada espectacular. Despois de marcar 25 goles en Preferente, o seu salto á Terceira non puido ser máis exitoso: anotou 14 goles, consolidándose como un dos artilleiros máis destacados da categoría. A súa capacidade de desmarque, definición e presenza na área fan del unha ameaza constante para as defensas rivais.

Pola súa banda, Antón Iglesias “Kopa”, nado en 1995, é un dos piares defensivos do Alondras CF. Actuando como pivote ou central, acumulou 2.651 minutos de xogo, sendo un auténtico seguro no equilibrio defensivo do equipo. A súa intelixencia táctica, experiencia e entrega converten ao baionés nun xogador imprescindible para o conxunto de Cangas.

Este recoñecemento pon en valor o traballo constante e silencioso destes dous futbolistas formados na comarca, exemplos claros de compromiso, superación e calidade. Gondomar e Baiona poden sentirse orgullosos dos seus embaixadores no fútbol galego.