A Nao Santa María xa está en Baiona e pode visitarse ata o domingo no Porto Deportivo
A histórica Nao Santa María, réplica do emblemático navío co que Cristóbal Colón cruzou o Atlántico en 1492, atópase atracada no Porto Deportivo de Baiona, onde permanecerá aberta ao público ata o domingo 11 de maio.
A súa visita enmárcase dentro das rutas de promoción histórica, ofrecendo á cidadanía e aos visitantes a posibilidade de subir a bordo dun auténtico museo flotante que recrea con fidelidade a vida mariñeira do século XV.
O horario de visitas é de 10:00 a 20:30 horas de xeito ininterrompido. As entradas poden mercarse directamente no barco ou a través da web tickets.naosantamaria.org, e teñen un prezo de 7 € para adultos, 4 € para nenos e nenas de 5 a 10 anos, e entrada gratuíta para menores de 5 anos. Tamén se ofrece un bono familiar por 18 € (2 adultos e ata 3 nenos/as).
A embarcación, construída en madeira seguindo técnicas tradicionais de carpintería de ribeira, conta con 29 metros de eslora, catro paus e cinco velas, e percorreu xa portos de Europa, México e Estados Unidos, levando consigo a historia da navegación transoceánica.
Esta escala en Baiona é especialmente simbólica, xa que se produce a poucos metros da carabela La Pinta, cuxo museo permanente é un emblema da vila. Así, o porto baionés convértese por uns días nun punto de reencontro histórico das grandes expedicións mariñas do século XV.
Unha oportunidade única para mergullarse no pasado e vivir de preto a historia da descuberta de América.
