Veciños de Nigrán dan o salto á gran pantalla na película “San Simón”
O filme de Miguel Ángel Delgado, que chega aos cines o 24 de outubro, revive o pasado da illa redondelá e conta coa participación de medio cento de nigraneses, incluída a actriz local Isabel Álvarez, de 89 anos.
A ría de Vigo e o Val Miñor convértense esta semana en protagonistas do cinema galego coa estrea de “San Simón”, a nova longametraxe dirixida por Miguel Ángel Delgado, que chega ás salas o 24 de outubro. O filme revive o pasado da illa redondelá, empregada como campo de concentración franquista entre 1936 e 1943, e faino cunha fonda conexión con Nigrán, xa que medio cento de veciños do municipio participaron como figurantes.
A primeira en ser chamada para o proxecto foi Isabel Álvarez Ramírez, veterana da Escola Municipal de Teatro de Nigrán, que aos 89 anos logrou o seu primeiro papel cinematográfico interpretando á nai dun dos presos republicanos. A súa presenza animou a moitos outros nigraneses, que se puxeron na pel dos máis de seis mil reclusos que pasaron pola illa durante a represión franquista. As escenas graváronse en espazos como o convento de Santa Clara de Pontevedra, recreando o sanatorio da prisión, en intensas xornadas de rodaxe de máis de doce horas.
A ligazón de Nigrán con “San Simón” vén de lonxe. O filme está inspirado no libro e documental “Aillados. A memoria dos presos de 1936 na Illa de San Simón”, elaborado hai máis de trinta anos polo actual alcalde de Nigrán, Juan González, xunto co realizador gondomareño Antonio Caeiro e a escritora e guionista Clara de Saá. A obra, publicada en 1995 por Ir Indo, foi pioneira no uso da memoria oral e recolle testemuños de corenta homes que sufriron aquel inferno.
O director Miguel Ángel Delgado contactou co alcalde pouco antes da pandemia para acceder á documentación e pasou varios meses residindo en Nigrán mentres preparaba o guión. En agradecemento, a produtora Morelli Producciones, en coprodución con Miramemira Films —responsable tamén de O que arde e O corno—, ofreceu aos veciños participar na rodaxe. O propio rexedor colaborou na organización do casting, no que tamén tomou parte o concelleiro de Sanidade, Mercados, Turismo Social e Festexos.
Estreada no Festival de San Sebastián dentro da sección Made in Spain, a película combina ficción e memoria histórica, seguindo o relato dun preso chamado Lamas que serve de fío condutor para retratar o horror e a esperanza dos internados na illa.
Para o Val Miñor, este estreo é moito máis que un evento cinematográfico: é unha homenaxe á memoria colectiva e á participación cidadá, un recordo de que as historias máis universais tamén nacen nas rías e nas mans dos seus veciños.