Tres detidos en Vigo e Nigrán nunha operación policial contra o tráfico de drogas

Axentes da Policía Nacional desartellaron unha organización criminal dedicada ao tráfico de drogas con base en Vigo e Nigrán, nun operativo no que se practicaron dúas entradas e rexistros e se detivo a tres persoas, entre elas o suposto cabecilla da rede. A investigación permitiu incautar máis de quince quilogramos de substancias estupefacientes, ademais de varios vehículos de alta gama, diñeiro en efectivo e diverso material para o manipulado da droga.

Un dos rexistros tivo lugar nun domicilio da zona da Carretera, en Nigrán, que os axentes identificaron como un dos puntos de almacenamento e reconto dos beneficios. No interior interviñéronse cinco mil euros en metálico, unha máquina de contar diñeiro e un dos vehículos empregados pola organización. O outro rexistro, nunha nave industrial situada en Vigo, saldouse coa incautación de máis de dez quilogramos de marihuana preparada para o consumo, un quilogramo de cocaína e dous mil euros en efectivo.

A investigación policial constatou que o grupo distribuía cocaína e marihuana a distintos puntos de Galicia e tamén ao norte de Portugal, chegando a mover mensualmente máis de cincuenta quilogramos de substancias ilícitas. O líder da trama organizaba transportes en dous vehículos: un deles levaba a droga oculta e o outro, conducido por el mesmo, actuaba como lanzadeira para garantir a seguridade do envío.

A intervención produciuse cando os axentes detectaron un destes desprazamentos e interceptaron un dos coches, no que se localizaron tres quilogramos de cocaína. Pouco despois foron arrestados os outros dous implicados, incluído o cabecilla. Os tres detidos pasarán a disposición xudicial nas próximas horas e a operación continúa aberta, sen descartarse novas detencións.