Tomiño aposta pola formación no medio natural coa iniciativa “Vive o Rural”

 O concello de Tomiño participa na segunda edición do programa educativo “Vive o Rural”, unha iniciativa promovida pola Deputación de Pontevedra para achegar a riqueza natural e patrimonial do rural galego ás novas xeracións.

O programa ofrece a estudantes e asociacións do municipio a oportunidade de visitar unha das granxas escolas seleccionadas, onde poden coñecer de primeira man as tarefas tradicionais do campo, o coidado de animais e a elaboración de produtos artesanais.

Este ano, a granxa escola situada en Tomiño é unha das cinco localizacións elixidas para acoller as actividades, consolidándose como un espazo de aprendizaxe vinculado á sustentabilidade e ao respecto polo medio ambiente. A iniciativa está dirixida a centros educativos e ANPAS de concellos de menos de 20.000 habitantes, cun orzamento incrementado ata os 60.000 euros, permitindo que máis entidades poidan beneficiarse desta experiencia formativa.

O éxito da primeira edición no 2024 motivou o reforzo do programa, que en Tomiño continúa a súa aposta pola educación ambiental e a valorización do mundo rural, conectando ás novas xeracións coas tradicións e recursos naturais do seu propio territorio.