O xogador de Nigrán, Carlos Alonso, ficha polo Coruxo para dar o salto á Segunda Federación.

O Coruxo FC continúa perfilando o seu plantel para a tempada 2025/26 cunha clara aposta pola mocidade, e unha das incorporacións máis salientables para a afección do Val Miñor é a de Carlos Alonso, defensa central de Nigrán, que chega procedente do filial do CD Lugo para reforzar a retagarda verde.

Formado nas categorías inferiores do ED Val Miñor, Carlos Alonso é un vello coñecido do fútbol da comarca e conta cunha ampla experiencia na Terceira Federación pese á súa mocidade. Tras o seu paso pola base do Val Miñor, deu o salto ao Rápido de Bouzas, onde disputou 79 partidos oficiais, antes de recalar no filial lucense. No Polvorín, participou en 25 encontros a pasada campaña, completando xa 104 partidos en Terceira Federación, o que evidencia a súa solvencia e madurez competitiva.

Con 23 anos recén cumpridos en agosto, o xogador nigranés chega a O Vao preparado para asumir o reto da Segunda Federación, categoría á que accede tras un proceso de formación continuo e destacado. Ademais da súa posición natural como central, tamén pode actuar como lateral dereito, o que lle engade valor táctico á defensa que dirixe Javi Pereira.