O veciño de Panxón que abandonou a súa mesa electoral xa ten sentenza: multa de 1.080 euros

Un veciño de Panxón (Nigrán) foi condenado por abandonar sen xustificación o seu posto nunha mesa electoral durante as eleccións xerais do 23 de xullo de 2023. O home fora designado como segundo vogal no colexio electoral do pavillón de deportes de Panxón, pero marchou sen chegar a asumir as súas funcións, incumprindo así a súa obrigación legal.

O caso resolveuse este martes no Xulgado do Penal número 1 de Vigo, onde se ditou sentenza tras un acordo de conformidade entre as partes. O acusado aceptou unha multa de 1.080 euros, evitando así unha pena máis grave que podería incluír mesmo prisión.

O delito está recollido no Código Penal como “abandono inxustificado das funcións electorais”, unha infracción que busca garantir o correcto desenvolvemento dos procesos democráticos. Formar parte dunha mesa electoral é unha obriga legal ineludible salvo causa xustificada e debidamente comunicada.