O Sergas visita Avelaíña e recoñece o seu labor como referente en saúde mental no sur de Pontevedra

Unha delegación da Dirección de Saúde Mental do Servizo Galego de Saúde (SERGAS) visitou as instalacións da Asociación Avelaíña para coñecer de primeira man o funcionamento dos seus recursos especializados en rehabilitación psicosocial, nunha xornada que supón un recoñecemento ao traballo que a entidade desenvolve desde hai máis de dúas décadas en coordinación co sistema público de saúde.

A comitiva estivo integrada por Almudena Díaz Pereira, subdirectora xeral de Atención á Saúde Mental, e Yolanda Triñanes, xefa do Servizo de Atención á Saúde Mental, Integración Psicosocial e Trastorno Mental Grave do SERGAS. Durante a visita percorreron os tres Centros de Rehabilitación Psicosocial e Laboral (CRPL) que Avelaíña xestiona en Ponteareas, A Guarda e Baiona, así como o piso protexido destinado a promover a autonomía das persoas usuarias.

A visita rematou no centro de Baiona, onde supervisaron as obras realizadas grazas a unha subvención do SERGAS para programas de interese xeral no ámbito dos trastornos mentais graves. As representantes do SERGAS interesáronse pola metodoloxía de intervención e pola coordinación cos dispositivos sanitarios da zona.

O xerente da entidade, Rafa Álvarez, subliñou a necesidade de reforzar os recursos públicos en saúde mental comunitaria. Avelaíña formalizou ademais un novo contrato co SERGAS desde o 1 de xaneiro de 2026, cofinanciado pola Unión Europea a través do FSE+ Galicia 2021-2027.