O pleno de Baiona avala a continuidade do proxecto do novo porto deportivo

O Concello de Baiona celebrou este mércores, 21 de maio, un Pleno Extraordinario solicitado polo grupo municipal socialista para debater sobre a execución e finalización do proxecto do novo porto deportivo, actualmente tramitado pola empresa concesionaria Nauplia Capital S.L.

A sesión coincidiu co décimo aniversario da aprobación do Plan Especial do Porto de Baiona, documento no que se basea a actuación que se pretende desenvolver. O equipo de goberno defendeu a legalidade e viabilidade do proxecto, salientando que conta con todos os informes sectoriais necesarios, incluído o informe favorable do Ministerio para a Transición Ecolóxica e o Reto Demográfico, que avala a súa compatibilidade coa Estratexia Mariña da Demarcación Noratlántica.

Durante o pleno, o goberno local acusou á oposición de xerar alarma social arredor dunha intervención que, segundo subliñaron, está recollida no planeamento urbanístico vixente desde hai unha década. Pola súa parte, desde a oposición cuestionouse o alcance real da intervención e o impacto que podería ter sobre o litoral, así como o modelo de porto que se quere impulsar.

O concelleiro de Urbanismo sinalou a necesidade de ordenar e urbanizar a contorna portuaria, argumentando que o estado actual do espazo afecta negativamente á imaxe da vila. Tamén destacou que o proxecto persegue mellorar a calidade urbana e paisaxística do fronte marítimo.

O pleno concluíu cun apoio maioritario á continuidade da tramitación do proxecto, que seguirá os procedementos establecidos pola normativa vixente e os informes sectoriais correspondentes.