O escritor nigranés Fran Fernández Dávila gaña o 35º Premio Literario Camilo José Cela

O escritor e enxeñeiro industrial de Nigrán, Fran Fernández Dávila, vén de ser recoñecido co 35º Premio Literario Camilo José Cela pola súa obra A lingua dos ósos, nun certame que volve poñer en valor o talento literario galego.

O galardón, dotado con 1.500 euros e unha estatuíña co busto do Nobel Camilo José Cela, foi entregado nun acto celebrado en Padrón, no que participaron o alcalde da vila, Anxo Arca, e a directora da Fundación Cela, Covadonga Rodríguez.

Durante a súa intervención, o rexedor destacou a calidade da obra premiada e puxo en valor a traxectoria de Fernández Dávila, subliñando a súa versatilidade creativa. Non en van, o autor nigranés xa contaba no seu palmarés co premio de poesía Rosalía de Castro, o que reforza o seu perfil como unha das voces destacadas das letras actuais.

Pola súa banda, Fran Fernández Dávila amosouse “inmensamente feliz e agradecido” por recibir un recoñecemento que cualificou de “tan prestixioso”. O escritor tamén quixo agradecer ao Concello de Padrón “o seu compromiso inquebrantable coa cultura e por manter vivo este premio ano tras ano”.

Ademais, destacou especialmente que, entre os 168 relatos presentados nesta edición, resultase gañador un texto escrito en galego, un feito que considera relevante para a proxección e normalización da lingua propia de Galicia.

Con este premio, Nigrán suma un novo motivo de orgullo cultural, ao contar cun autor que continúa acadando recoñecementos e contribuíndo á riqueza literaria do país