O Coro De Baiña, Belesar E Baredo Cantará Este Domingo Na TVG
“A música é imperfección, iso é o que a fai verdadeira. O demais é só filigrana”. Así define a súa paixón José Barcia, director do coro da unidade pastoral de Baiña, Belesar e Baredo, que este domingo terá a oportunidade de cantar na misa que retransmitirá en directo a Televisión de Galicia desde San Frutuoso. Un total de cincuenta veciños desprazaranse para participar nunha cita que supón un salto adiante para este grupo nacido hai menos dun ano.
De oito voces a un coro de trinta persoas
O coro botou a andar hai dez meses, cando tres veciñas de Baiña, entre elas a presidenta do grupo Ardelume, Pilar Rodríguez, buscaban crear un coro parroquial e para iso contactaron con Conchi Álvarez, que as puxo na pista de José Barcia, quen, entre risas, di: “eu sempre digo que sí”.
Con tan só oito integrantes, aínda que dous deles abandonaron xa no primeiro ensaio porque non podían subir á parte alta da igrexa onde estaba o órgano, a súa primeira actuación foi hai catro meses, na misa da Cela en Baredo. “Transmitinlles que non fixeran caso das críticas: non se trata de cantar máis forte, senón mellor”, lembra Barcia.
Co paso das semanas, as voces foron gañando confianza e a xente comezou a preguntar na rúa como podía entrar no coro. Hoxe xa son arredor de trinta membros, e mesmo hai novas incorporacións, incluída a filla de 20 anos do propio director.
Ensaios e convivencia en Baiña
Os ensaios celébranse na igrexa de Baiña, onde Barcia impuxo unha norma moi particular: despois de cada ensaio e cada actuación, todos teñen que compartir un tempo de convivencia tomando algo xuntos. Para el, esa é a clave: “Canto máis unida está a xente, mellor canta”.
Un director singular
Fillo dos propietarios do histórico comercio baionés Las Verísimas, que pechou nos anos 90, José Barcia é licenciado en Filosofía e conta cunha traxectoria vital e musical chea de matices: foi lexionario voluntario en 1989, practicou a musioterapia en residencias de maiores ata a chegada da pandemia, e no eido artístico fundou a banda As Moscas Verdes xunto a Guillermo Fernández de Berrogüetto, con quen chegou a telonear a Siniestro Total. Posteriormente creou a Banda do Predicador e colaborou en proxectos con Carlos Núñez. Agora inicia unha nova aventura con Xavier Nova, Pepe Casal, Paco Juncal e él mesmo, explorando tamén versións acústicas de música grunge.
A cita na televisión
Este domingo, coa retransmisión da misa en directo pola TVG, o coro de Baiña, Belesar e Baredo verá recoñecido o seu esforzo e ilusión, demostrando que a música, coa súa imperfección e a súa humanidade, tamén pode ser un camiño de comunidade.