O Concurso de Rondallas da Área Metropolitana de Vigo presenta a súa oitava edición con récord de participación
O VIII Concurso de Rondallas da Área Metropolitana de Vigo celebrarase o 17 de xaneiro de 2026 no Ifevi e contará cun total de 18 agrupacións, catro máis que o ano pasado. A presentación tivo lugar este sábado en Vigo, con presenza do director xeral de Cultura, Anxo M. Lorenzo, e da delegada territorial da Xunta en Vigo, Ana Ortiz.
Durante o acto destacouse o papel das rondallas na preservación do patrimonio inmaterial galego, mantendo viva unha tradición que combina música, vestimenta característica e un desfile propio que cada Nadal reúne centos de participantes.
Nesta edición incorpóranse dúas novas formacións, Baiona e Redondela, que se suman ás de Vigo, Mos, O Porriño, Gondomar, Nigrán e Tui, todas elas con arredor de cen compoñentes. As agrupacións mostrarán a súa diversidade musical e estética, parte esencial desta expresión cultural.
Tamén se anunciou que o 11 de decembro chegará ás pantallas a película Rondallas, dirixida por Daniel Sánchez Arévalo, que incluíu escenas gravadas durante o certame do ano pasado e ofrecerá unha mirada cinematográfica a esta tradición tan arraigada na área de Vigo.