O concello e o Gondomar F.B. homenaxean a Miguel Román na súa volta a As Cercas

Gondomar viviu unha xornada moi especial coa visita do seu veciño Miguel Román, xogador do Real Club Celta de Vigo, ás instalacións municipais do campo de fútbol de As Cercas, o lugar onde deu os seus primeiros pasos como futbolista.

Miguel Román volveu demostrar a gran persoa que é, destacando pola súa cercanía, humildade e xenerosidade, compartindo unha tarde inesquecible con todos os presentes e, especialmente, cos xogadores do Gondomar Fútbol Base.

Antes do inicio do encontro entre o Gondomar F. B. e o Rápido de Bouzas, dous equipos nos que militou antes de debutar co Celta, o futbolista realizou o saque de honra, nun momento cargado de emoción e simbolismo para a afección local.

Como mostra de recoñecemento e orgullo de todo Gondomar, o alcalde e o presidente do club fixéronlle entrega dunha fotografía da súa etapa como xogador do Gondomar F. B., así como dunha camiseta conmemorativa, en agradecemento á súa traxectoria deportiva e ao exemplo que representa dentro e fóra do terreo de xogo.