O Concello de Oia entrega 21 axudas á natalidade e anuncia nova convocatoria para 2026

Oia fixo balance da súa primeira convocatoria de axudas á natalidade, posta en marcha no ano 2025 para apoiar a familias con nacementos ou adopcións producidas durante 2024. En total, 20 fogares beneficiáronse, sumando 21 nacementos, cun importe de 200 euros por menor. O investimento final ascendeu a 4.200 euros, nun programa pioneiro no municipio e ben acollido pola veciñanza.

O obxectivo destas axudas é dobre: apoiar ás familias e contribuír a frear o descenso demográfico, fomentando ao mesmo tempo a actividade económica local. A medida encaixa na estratexia municipal contra o despoboamento e no impulso á conciliación.

O Concello confirma que manterá esta liña en 2026, reservando nos próximos orzamentos unha nova partida destinada ás axudas por nacementos e adopcións producidos en 2025, reforzando así o compromiso co benestar social.

Desde Alcaldía sinalan que esta iniciativa “apoia ás familias e impulsa o comercio local, reforzando o compromiso co desenvolvemento e a cohesión da comunidade”.