O Concello de Nigrán ofrece este domingo un bingo social de Entroido no Auditorio Municipal
O Concello de Nigrán celebra este domingo 15 de febreiro, a partir das 18:00 horas no Auditorio Municipal, un Bingo Social de Entroido aberto a toda a veciñanza e con participación totalmente gratuíta.
O premio ao ‘Bingo’ será unha cesta composta por produtos típicos do cocido galego: unha botella de viño, media cacheira, un lacón, chourizos, patacas, repolo e garavanzos. Pola súa banda, o premio á ‘Liña’ consistirá nunha caixa de orellas de Entroido.
En total, sortearanse 10 cestas e o Concello entregará de balde un cartón por persoa e por bingo, co obxectivo de fomentar a participación e o ambiente festivo nestas datas tan sinaladas.
Máis eventos de Entroido
O eixo central do Entroido nigranés continuará co tradicional concurso de comparsas o venres 20 de febreiro ás 21:00 horas e co enterro do Kiko de Parada na tarde-noite do sábado 28.
A programación complétase con outras propostas para todos os públicos:
- Proxección de “+ Cuñados. Un Entroido Criminal” (hoxe ás 19:00 horas).
- Entroido infantil (martes 17).
- Proxección da película “Río” (sábado 21).
- Excursión á Festa do Lacón en Cuntis (domingo 22), con inscrición previa este venres 13 de 9:00 a 12:00 no Centro Social de Vilameán e cun custe de 23 euros por persoa.