O belén dentro dunha árbore, obra de Juan Alvés, é arte puro e atópase na Carrasca

A Carrasca, no concello de Nigrán, acolle este Nadal unha creación artística tan orixinal como emotiva: un Belén instalado no interior dunha árbore, aproveitando unha cavidade natural do tronco. A obra é autoría de Juan Alvés, coñecido artista local e empresario do sector das cociñas, cunha fonda vinculación coa parroquia e coa creación artesanal en madeira.

O nacemento sorprende pola súa perfecta integración coa natureza. Figuras tradicionais, palla, pequenos elementos decorativos e unha iluminación discreta conforman unha escena que respecta a forma da árbore e realza a súa forza simbólica. O conxunto transmite sinxeleza, coidado polos detalles e unha clara aposta por unir tradición, creatividade e respecto polo medio natural.

Juan Alvés é especialmente recoñecido polos seus traballos en madeira, material co que leva anos dando forma a pezas únicas. O seu nome está ligado tamén a A Presa da Regueira, un parque natural creado polo propio artista, cun lago incluído, que se converteu nun espazo de referencia para o paseo, o descanso e o contacto coa natureza.

Este Belén dentro dunha árbore converte un recuncho da Carrasca nun pequeno museo ao aire libre, accesible para toda a veciñanza, e pon en valor o arte feito a man e a identidade do territorio.