Localizado en Panxón o mozo de 18 anos desaparecido en Ourense desde o 11 de marzo

O mozo de 18 anos desaparecido en Ourense desde o pasado 11 de marzo foi localizado en Panxón, no municipio pontevedrés de Nigrán, segundo confirmaron fontes da investigación.

A súa desaparición activara unha alerta por parte da organización SOS Desaparecidos, que este luns difundira o seu caso para solicitar a colaboración cidadá. A mobilización deu resultado e, tras a súa localización, a alerta foi desactivada.

Do mozo non se tiñan noticias desde había arredor de dúas semanas, o que xerara preocupación entre familiares e coñecidos. Polo momento non transcenderon máis detalles sobre as circunstancias da súa desaparición nin sobre o seu estado, aínda que a resolución do caso supón un alivio tras varios días de incerteza.