Juan Antonio González, alcalde de Nigrán, referente na recuperación de San Simón como lugar de memoria

A publicación no BOE da incoación do procedemento para declarar San Simón Lugar de Memoria Democrática marca un fito histórico en Galicia. A illa, tristemente coñecida como cárcere franquista polo que pasaron máis de 5.600 persoas e onde morreron centos delas, entra agora nun proceso oficial que busca poñer fin ao seu uso frívolo e devolvela ao respecto e á dignidade que merece.

Neste camiño, un dos protagonistas é o alcalde de Nigrán, Juan Antonio González (PSdeG). Historiador de formación, González leva décadas investigando a represión franquista en Galicia. Foi coautor do libro e documental “Aillados. A memoria dos presos de 1936 na Illa de San Simón”, traballo pioneiro que recuperou testemuños de superviventes e familiares cando apenas se falaba do tema. Tamén asinou a obra “Nigrán. Memoria dunha guerra (1936-1939)”, referencia obrigada para entender o que aconteceu na comarca.

O seu labor académico e divulgativo explica en boa medida por que hoxe San Simón dá este paso decisivo. González non só foi investigador: tamén se converteu en voz pública contra discursos negacionistas, achegando documentos e arquivos que acreditan a dimensión da represión. Agora, como alcalde, representa a xeración que une memoria e acción política.

A declaración impulsada polo Goberno de España contou co apoio da Comisionada de Memoria Democrática e do Secretario de Estado, que recentemente visitaron a illa xunto a colectivos memorialistas. Tamén a alcaldesa de Redondela, Digna Rivas, amosou unha acollida entusiasta a este proceso. Pero é imposible entender o novo rumbo de San Simón sen lembrar a traxectoria de quen, desde Nigrán, fixo da memoria unha causa persoal e colectiva: Juan Antonio González.

Con esta decisión, a illa recupera o seu lugar na historia recente de Galicia e abre a porta a unha xestión que honre ás máis de seis mil persoas que sufriron entre os seus muros. Unha vitoria da memoria que ten nome propio.