Gondomar levanta o telón en marzo: teatro, humor e monólogos para no parar de rir
O Auditorio Lois Tobío converterase no gran epicentro cultural do Val Miñor durante o mes de marzo cunha programación intensa e variada que combina teatro e monólogos de destacados nomes da escena galega. O Concello de Gondomar aposta así por unha oferta estable e de calidade, pensada para públicos diversos e cun claro protagonismo do humor feito en Galicia.
A programación arrinca o 7 de marzo con “Bernarda (Vilalba 1975)”, unha obra de teatro recomendada para maiores de 14 anos que propón unha revisión escénica de gran intensidade dramática. A peza abre o mes cunha proposta que aposta pola reflexión e pola forza interpretativa.
O 8 de marzo, coincidindo co Día Internacional da Muller, será a quenda do humor con “Falade galego rapazada… é unha pasada!”, o monólogo de Pepo Suevos. Cun estilo directo e próximo, o coñecido humorista ofrece unha defensa divertida da lingua galega, mesturando ironía, retranca e complicidade co público.
O 15 de marzo, o escenario do Lois Tobío recibirá a Carlos Blanco con “A penúltima”. Un dos grandes referentes do humor galego traerá un espectáculo cargado de anécdotas, situacións cotiás e esa retranca tan característica que garante risas de principio a fin.
O peche do mes será o 22 de marzo con “Sen restricións”, un show de monólogos protagonizado por Carmen Méndez, Ledicia Sola e Marta Doviro. Tres voces femininas que prometen unha sesión fresca, sen filtros e con moito carácter, abordando temas actuais desde unha óptica desenfadada.
A programación cultural terá continuidade nos meses seguintes. O 12 de abril chegará “O 90% é verdade”, monólogo de Isi, mentres que o 19 de abril será a quenda de “Meigas”, con Arantxa Treus e Jazmín Abuín.
Xa o 10 de maio, Gondomar acollerá o espectáculo exterior “Os carunchos. Unha gorxa chea de paxaros”, ampliando así a oferta a outros formatos escénicos.
Todas as funcións comezarán ás 19:00 horas. As entradas poden adquirirse a través da web municipal (taquilla.concellodegondomar.gal).