Gondomar destaca no Entroido de Tui con dúas propostas premiadas

O talento das comparsas de Gondomar brillou con forza no Desfile-Concurso de Entroido celebrado en Tui, onde dúas agrupacións do municipio acadaron importantes recoñecementos grazas á súa calidade artística e á potencia das súas montaxes.

A gran triunfadora da xornada foi “2030 do Porvir”, da Asociación Carnavales de Mañufe de Gondomar, que se proclamou gañadora absoluta do certame. A súa proposta converteu o Entroido nunha utopía crítica sobre o futuro do planeta, articulando un discurso visual e escénico arredor dos grandes retos sociais e ambientais do noso tempo.

A comparsa construíu un universo simbólico no que convivían estética futurista e memoria ancestral, cun coidado deseño de vestiario que apostou pola androxinia como linguaxe de igualdade, referencias xaponesas e imperiais e unha paleta cromática en tons pastel atravesada polo vermello como símbolo de vida e esperanza. A dramaturxia combinou elementos tribais e tecnolóxicos, reforzada por música en directo con percusión, guitarra eléctrica e batería, o que lle valeu tamén o primeiro premio na categoría de música.

A carroza sintetizou o proxecto nun ecosistema alegórico do planeta, estruturado en diferentes capas e con 17 elementos verticais representando ámbitos como o mar, a vexetación, a industria ou as enerxías renovables, cubertos por vexetación viva como chamada de atención fronte á crise climática. Esta posta en escena foi recoñecida ademais co cuarto premio en carrozas.

Pola súa banda, a Asociación Cultural O Millor de cada Casa de Gondomar acadou o segundo premio en carrozas con “O Segredo do Frondal”. A súa ambientación trasladou o público a un bosque fantástico dominado pola “Cova do Elfo Superior”, destacando pola riqueza ornamental, o detalle artesanal e a capacidade de crear unha atmosfera envolvente e máxica.