Gondomar celebra o Samaín cunha programación chea de actividades, contacontos, música e o regreso do esperado Túnel do Terror no antigo matadoiro municipal
Gondomar prepárase para vivir unha das noites máis esperadas e escalofriantes do ano: o Samaín 2025. O Concello volve apostar forte por esta festa tradicional galega, cunha programación pensada para todos os públicos e un ambiente único nas rúas e prazas da vila, que se encherán de luces, decoracións e espírito festivo.
A celebración, que terá lugar o xoves 31 de outubro, comezará ás 17:00 horas cun contacontos especial de Samaín na Praza Paradela —ou na Biblioteca Municipal, se o tempo non acompaña—, pensado para os máis pequenos da casa. A xornada continuará ás 19:30 horas coa apertura do temido Túnel do Terror, instalado no antigo matadoiro municipal, convertido para a ocasión nun auténtico escenario de pesadelos.
Este espazo, xa convertido nun clásico da programación do Samaín en Gondomar, será recreado grazas ao esforzo conxunto das asociacións O Millor de Cada Casa, de Vincios, e Carnavales de Mañufe, que levan semanas traballando para sorprender —e asustar— aos visitantes. O túnel estará cheo de sustos, personaxes misteriosos e moitas sorpresas, polo que só os máis valentes se atreverán a entrar.
A noite pecharase cunha sesión musical con DJ na Praza Paradela a partir da medianoite, que porá ritmo e diversión a unha das citas máis máxicas do outono. Sempre, iso si, se as condicións meteorolóxicas o permiten.
Paralelamente, a Asociación O Millor de Cada Casa fai un chamamento a todas aquelas persoas que queiran vivir o Samaín “desde dentro”. Baixo o lema “¿Gustaríache participar, pero desde dentro?”, a organización busca voluntarios e voluntarias dispostos a formar parte do equipo encargado de dar vida ao Túnel do Terror. As persoas interesadas poden anotarse a través do teléfono 622 848 236.
Ademais, o Departamento de Comercio do Concello de Gondomar lanza unha iniciativa para fomentar a participación veciñal e dinamizar o comercio local. As vivendas da urbanización O Miñor e os establecementos comerciais están convidados a decorar os seus espazos con motivos de Samaín, enchendo a vila de meigas, cabazas e pantasmas. Como incentivo, o Concello repartirá caramelos entre os locais e casas participantes, promovendo o tradicional “truco ou trato” e mantendo viva a esencia comunitaria desta celebración.
O alcalde de Gondomar, Paco Ferreira, destacou que o Samaín “é unha das festas máis nosas, que combina tradición, diversión e participación cidadá”. Subliñou ademais que “esta cita serve para dinamizar o comercio local e fortalecer os lazos entre veciños, facendo de Gondomar unha vila viva, alegre e chea de cor tamén no outono”.
A proposta deste ano reafirma a aposta do Concello por recuperar e poñer en valor as tradicións galegas, combinándoas con actividades atractivas para todas as idades. Con esta nova edición, Gondomar consolídase como un dos municipios máis dinámicos na celebración do Samaín nas Rías Baixas, ofrecendo un programa que promete emocións fortes, diversión e moito espírito máxico.