GastroMovida chega a Baiona para promocionar o turismo e a gastronomía galega

Baiona converteuse hoxe nunha das paradas da gastromovida, un congreso itinerante promovido pola empresa Diesemm que percorre diferentes puntos de Galicia co obxectivo de promocionar o territorio, a súa gastronomía e o potencial turístico da comunidade ante un grupo de 25 prescritores nacionais, entre os que se atopan cociñeiros, hostaleiros, axencias, influencers e medios de comunicación especializados.

Durante a xornada, os participantes puideron coñecer os principais atractivos da vila, a súa oferta gastronómica e paisaxística, e vivir unha experiencia que combina turismo, cultura e produto local. O percorrido inclúe tamén outras localidades como Vigo e Cambados, e integra o Camiño Portugués pola Costa como un dos elementos que completan a experiencia de promoción.

“O que buscamos é mostrar o noso produto, a nosa gastronomía e o noso territorio. Queremos dar a coñecer a nosa terra a través dos ollos de profesionais que logo a van recomendar”, explicou David Suárez, CEO de Diesemm e organizador da iniciativa.

A delegada territorial da Xunta de Galicia, Ana Ortiz, destacou que a Xunta decidiu patrocinar o evento pola súa importancia estratéxica na promoción turística de Galicia:

“O Camiño Portugués pola Costa é un auténtico luxo, un diamante en bruto, pero gastromovida vai máis aló: pretende poñer en valor todo o que temos en restauración, hostalaría e turismo, para que quen nos visita queira volver e traer a outros”.

Tras o encontro en Baiona, os asistentes realizaron un pequeno tramo simbólico ata o faro pequeno de Cabo Silleiro, onde se celebrou un congreso experimental coa presenza da directora de Turismo de Galicia, Romina Fernández.