Erizana dá un golpe case definitivo polo ascenso tras gañar ao Colexio Hogar en Vigo

O Erizana Club de Fútbol deu un paso de xigante na loita polo ascenso tras impoñerse por 0-1 ao Colegio Hogar en Vigo, nun partido moi serio do conxunto de Baiona, que volveu demostrar a súa solidez defensiva e capacidade competitiva nos encontros decisivos.

O equipo erizanista xa vencera ao rival na primeira volta en Baiona e repetiu triunfo nun duelo directo pola cabeza da clasificación. Grazas a esta vitoria, o Erizana consolídase como líder con 46 puntos, mentres que o Colexio Hogar queda con 40, unha diferenza que comeza a ser moi importante cando a liga entra no seu tramo decisivo.

A xornada tamén trouxo resultados favorables para o líder. O Mosende caeu por 3-1 ante o San Salvador, quedando agora a sete puntos do primeiro posto. Pola súa parte, o Tebra tamén perdeu por 2-1 no campo do Salvaterra, resultado que deixa ao conxunto de Tebra a nove puntos do liderado.

Con estes marcadores, a xornada resultou redonda para o Erizana, que ve cada vez máis preto o obxectivo de recuperar a Primeira Futgal, categoría que perdera a pasada tempada.

O conxunto de Baiona afronta agora as próximas semanas con vantaxe na clasificación e coa sensación de que, mantendo o nivel mostrado, o ascenso pode estar cada vez máis preto.