Bixo entra na recta final da súa misión biolóxica no espazo co apoio da Zona Franca de Vigo

O proxecto BIXO (Bacteriological Intercommunication eXperiment in Orbit) do UVigo SpaceLab entra na súa fase final antes do lanzamento ao espazo. O nanosatélite, deseñado e construído por estudantes da Universidade de Vigo, contará co apoio e patrocinio do Consorcio da Zona Franca de Vigo.

O satélite, dun peso aproximado de tres quilos, levará ao espazo un cultivo bacteriano co obxectivo de estudar durante nove meses como afecta a exposición prolongada ao ambiente espacial a un organismo vivo. A misión desenvolverase a uns 440 quilómetros da Terra, enviando imaxes e datos científicos ao longo do experimento.

O equipo presentou os avances do proxecto ao delegado do Estado na Zona Franca, David Regades, nun encontro no que tamén participaron representantes do proxecto como Guillermo Calvo, xunto cos estudantes Daniel Collarte e Alejandro García, en representación dos máis de cincuenta integrantes do equipo.

BIXO será lanzado ao espazo nun foguete desde China tras gañar en 2022 o Space Universities Cubesat Challenge, no que participaron máis de 200 universidades de todo o mundo. O lanzamento correrá a cargo da Academia China de Tecnoloxía de Vehículos de Lanzamento.

Nos próximos meses o equipo continuará coas probas finais do satélite, incluíndo a validación da cámara biolóxica, o estudo estatístico dos sensores de radiación e a montaxe da estación terrestre que permitirá recibir os datos enviados desde órbita.

Esta misión converterá a BIXO no satélite máis pequeno con carga biolóxica posto en órbita, un paso relevante para comprender se é posible manter organismos vivos durante longos períodos no espazo e avanzar nas futuras misións espaciais con presenza humana.