Baiona recibe novos axentes da Garda Civil no marco do reforzo provincial anunciado polo Goberno

A Comandancia da Garda Civil de Pontevedra conta desde hoxe con 41 novos axentes que se incorporan aos seus destinos nas diferentes unidades da provincia, entre elas o posto de Baiona, que verá reforzada a súa dotación en materia de seguridade cidadá.

O acto de benvida estivo presidido polo subdelegado do Goberno, Abel Losada Álvarez, e polo xefe da Comandancia de Pontevedra, o coronel Manuel Touceda Souto, quen destacaron a importancia deste reforzo para mellorar a atención e a presenza da Garda Civil no territorio.

Entre o novo persoal incorporado atópanse 1 capitán, 5 sarxentos, 5 cabos e 30 gardas civís, que se integrarán en diferentes servizos como a Central Operativa de Servizos, SEPRONA, Servizo Fiscal e Fronteiras, Servizo Marítimo, Intervención de Armas, Tráfico e Unidade de Seguridade Cidadá.

A chegada deste persoal supón un importante impulso para as unidades territoriais de Ponteareas, O Porriño, Baiona, Cangas do Morrazo, Cambados, Sanxenxo e Lalín, reforzando a vixilancia, a atención cidadá e a capacidade de resposta ante emerxencias en toda a provincia.

Con este incremento, o Goberno pretende reforzar a seguridade e a proximidade da Garda Civil nos concellos costeiros, especialmente en zonas de alta afluencia turística como Baiona, onde a coordinación entre os distintos corpos de seguridade é clave para garantir a convivencia e a prevención do delito.