Baiona izou esta mañá a bandeira do distintivo Sendeiro Azul 2025 na Praia da Ribeira

Baiona deu este sábado 31 de maio un novo paso na súa aposta polo desenvolvemento sostible e o respecto ao medio ambiente coa izada oficial da bandeira que acredita o “Sendero Litoral de Baiona” como Sendeiro Azul 2025. O acto tivo lugar ás 12:00 horas nas inmediacións da Praia da Ribeira, coa presenza do alcalde e de todos os concelleiros da corporación municipal.

O distintivo, concedido pola Asociación de Educación Ambiental e do Consumidor (ADEAC), recoñece o labor dos concellos na recuperación de itinerarios naturais que permiten a interpretación do patrimonio ambiental, fomentando unha actividade turística respectuosa e sostible. No caso de Baiona, o sendeiro premiado conta cun percorrido duns seis quilómetros e baixa dificultade, unindo A Ramallosa co Parador Nacional, pasando polo fermoso Paseo Monte Boi, cunha vista privilexiada sobre a costa baionesa.

Con este galardón, Baiona entra a formar parte da lista de 154 sendeiros azuis de toda España, consolidando o seu compromiso coa conservación do medio natural e a promoción dun turismo que pon en valor o territorio.

No acto desta mañá, no que tamén participaron representantes de colectivos veciñais e sociais, o alcalde destacou a importancia deste tipo de recoñecementos como “un estímulo para seguir traballando por un concello máis sostible e accesible para todos”.