Baiona consolídase como porta do Camiño Portugués pola Costa, que supera ao Tradicional

O Camiño Portugués pola Costa acadou en setembro un fito histórico ao superar por primeira vez ao Tradicional, con 15.771 peregrinos, 3.371 máis que no mesmo mes de 2024. A ruta convértese así na segunda máis elixida, só por detrás do Camiño Francés, mantendo unha tendencia de crecemento que se confirma desde hai meses.

Baiona consolídase como un punto clave do Val Miñor, situándose entre os top 10 puntos de inicio con case 9.000 peregrinos acumulados entre xaneiro e setembro, medio milleiro máis que o ano pasado. Vigo ascende á sexta posición con 3.305 peregrinos, e Tui mantense no segundo posto con 6.628. Outros concellos do Val Miñor, como Nigrán e Gondomar, tamén mostran incrementos destacados.

O aumento de peregrinos débese en gran medida á chegada de turistas estranxeiros, que representan máis do 83 % do total, con especial presenza de estadounidenses (2.203), alemáns (1.737) e italianos (953). Completan o top 5 Polonia e Reino Unido, mentres que Australia, Portugal, Canadá, República Checa e Irlanda pechan o top 10.

Entre os puntos de inicio máis destacados, ademais de Baiona, están Porto, Porto Costa, Valença, A Guarda, Lisboa, Viana, Ponte de Lima, Oia e O Porriño, mostrando un incremento xeneralizado en todos os municipios de referencia do Camiño Portugués pola Costa. O total acumulado de xaneiro a setembro tamén reflicte este crecemento: Tui pasa de 32.612 a 36.726 peregrinos, Vigo de 13.132 a 15.967, e Baiona de 7.582 a 8.945, consolidando o Val Miñor como un eixo cada vez máis relevante desta ruta xacobea.