avanza a recuperación da duna de samil coa construción dun novo paseo

Tres meses despois do inicio das obras de rexeneración da duna de Samil, a transformación da praia xa é notable.

A desaparición do paseo entre a pista de patinaxe e o areal eliminou unha barreira artificial que databa dos anos 70, permitindo que a duna recupere progresivamente o seu estado natural de hai máis de medio século.

Os traballos avanzan a bo ritmo. Logo da demolición dos 450 metros do antigo paseo e da retirada de lousas e formigón, os operarios están agora acondicionando o terreo para a construción dun novo paseo máis respectuoso coa dinámica natural da praia. Esta medida busca reforzar a resistencia da duna fronte aos temporais marítimos.

A intervención chama a atención dos viandantes, que atopan unha valado pechando a zona onde antes estaba o paseo, agora convertido nunha sucesión de montañas de area e pedras. O proxecto prevé a construción dun novo paseo de 12 metros de ancho, retranqueado 25 metros respecto ao anterior. Ademais, nos próximos nove meses executarase un tramo de 250 metros e unha senda a través do pinar que conectará coa parte final da praia, garantindo unha integración máis harmoniosa coa contorna natural.