Arquitectos e enxeñeiros visitan os terreos do futuro Parque Deportivo de Porto do Molle en Nigrán
Un nutrido grupo de arquitectos e enxeñeiros participou o luns nunha visita guiada aos terreos do futuro Parque Deportivo Inclusivo Porto do Molle, acompañado por representantes de Discamino, da Sociedade Atlética Val Miñor e do grupo de expertos ‘Un Nigrán para todos’. O obxectivo foi que os licitadores interesados no concurso de ideas convocado polo Concello de Nigrán e o COAG (Colexio de Arquitectos de Galicia) puidesen resolver dúbidas in situ, ante técnicos municipais e coa presenza do alcalde, Juan González, e dos edís de Urbanismo e Deportes. O prazo de presentación de propostas permanece aberto ata o 24 de novembro ás 14:00 horas.
“Vós sodes os expertos; nós queremos que este espazo sexa accesible de xeito universal e que complemente as necesidades do Pavillón de Panxón, incluíndo pistas de atletismo. Así se fixeron as bases; como se materializará xa queda nas vosas mans”, subliñou o alcalde.
O concurso desenvolverase en dúas fases. A primeira, aberta, pública e anónima, céntrase na presentación de ideas iniciais, das que se seleccionarán cinco finalistas, que pasarán á segunda fase para desenvolver a súa proposta como anteproxecto. Entre estes cinco elixirase ao gañador, que recibirá o contrato de redacción do proxecto e dirección de obra valorado en 206.264,31 €, así como un premio de 12.100 €, mentres que o segundo, terceiro e dous accésits recibirán 7.500 €, 5.000 € e 2.500 € respectivamente. O xurado estará formado por arquitectos designados polo COAG.
O parque deberá completar a actual pista de atletismo e skate, incorporar un espazo cuberto para deportes federados, unha bancada para 250 espectadores, vestiarios e aparcadoiro. O Concello destinará 4,5 millóns de euros, procedentes do pago de Zona Franca, á construción desta infraestrutura.