A Policía Nacional detén un home en Vigo por tentar queimar a casa da súa exmuller en Tomiño con ela e a filla dentro

A Policía Nacional detivo na noite deste martes un home de 45 anos acusado dun presunto delito de violencia de xénero, despois de intentar prenderlle lume á casa da súa exmuller na parroquia de Santa María de Pinzás, no concello de Tomiño (Pontevedra), mentres ela e a súa filla, maior de idade, se atopaban no interior.

Segundo fontes policiais, o suceso tivo lugar pola tarde, cando a muller, de 51 anos, alertou ás autoridades de que o seu exmarido tentara incendiar a vivenda. Ata o lugar desprazáronse efectivos da Policía Local de Tomiño e da Garda Civil, que atoparon a nai e a filla en bo estado físico, aínda que visiblemente afectadas polo ocorrido.

A vítima explicou que o home lle enviara mensaxes de audio con ameazas de morte antes de presentarse na casa, iniciar o lume e fuxir. Afortunadamente, ambas lograron apagar as chamas utilizando unhas alfombras, evitando así que o incendio se estendese e puxese en perigo as súas vidas.

Unha vez informado de que o presunto agresor podería atoparse en Vigo, o aviso trasladouse á Policía Local da cidade e á comisaría da Policía Nacional. Finalmente, ás 20:45 horas, os axentes localizaron o sospeitoso nunha vivenda do barrio de Beade, onde reside a súa nai. Foi detido e trasladado á comisaría, onde pasou a noite nos calabozos.