A Deputación mellorará a seguridade viaria na ep-3102 tomiño-sabarís nos concellos de Tomiño, Gondomar e Baiona por 662.000 euros

A Deputación de Pontevedra aprobou o proxecto de mellora da seguridade viaria na EP-3102 Tomiño-Sabarís, ao seu paso polos concellos de Tomiño, Gondomar e Baiona, cun investimento de 662.000 euros.

O proxecto cubrirá un tramo de 9,267 km, incluíndo a reposición integral do firme, a mellora do sistema de drenaxe e a renovación da sinalización horizontal e dos sistemas de contención de vehículos. As obras contemplan a retirada de pavimentos deteriorados, fresado das capas superficiais, instalación de novas conducións de drenaxe, arquetas de formigón, beirarrúas, nova sinalización e barreiras metálicas de seguridade.

Segundo o presidente provincial, Luis López, estas actuacións buscan alongar a vida da estrada e garantir a seguridade viaria para todas as persoas que circulan por estes concellos.