Nigrán busca a imaxe do seu festival de jazz cun concurso de carteis dotado con 700 euros

O Concello de Nigrán vén de convocar unha nova edición do concurso de carteis ‘Quin Alborés-Nigranjazz’, unha cita xa consolidada que premiará con 700 euros a proposta gañadora que represente a imaxe do festival na súa vindeira edición. O prazo para presentar traballos estará aberto ata o 6 de maio.

O certame, vinculado ao Nigranjazz, rende homenaxe desde 2010 ao artista local Quin Alborés, quen foi unha figura clave nos inicios do evento e autor dos seus tres primeiros carteis.

A convocatoria está dirixida a persoas maiores de 18 anos, que poderán presentar ata dúas obras inéditas cunha estética relacionada co jazz. Os carteis deberán ter formato vertical A2 e presentarse de maneira anónima, tal e como establecen as bases, dispoñibles na web municipal e na casa consistorial.

As propostas poderán enviarse por vía electrónica, a través do Rexistro ou por correo postal, seguindo as indicacións recollidas na convocatoria oficial.

Segundo destacou o alcalde, Juan González, esta iniciativa reflicte a forte conexión do municipio coa cultura jazzística e permite fusionar creatividade visual e música nun evento de referencia na programación cultural local.