A Garda Civil de Gondomar detén a un home de 35 anos por varios roubos, delitos contra a seguridade viaria e estafa
A Garda Civil do Posto de Gondomar detivo a un home de 35 anos, veciño de Caldas de Reis, como presunto autor de dous delitos de roubo con forza, un delito de furto de cable telefónico, estafa, condución dun vehículo a motor co carné retirado por perda total de puntos, alcoholemia positiva, resultado positivo nunha proba indiciaria de drogas —pendente de confirmación por laboratorio—, así como resistencia e desobediencia aos axentes da autoridade.
Así mesmo, a Garda Civil investiga a outro home de 25 anos, veciño de Gondomar, pola súa presunta implicación en dous delitos de roubo con forza e un delito de furto. Ambos contaban con numerosos antecedentes policiais.
A investigación iniciouse no mes de outubro do pasado ano, tras unha denuncia por un roubo con forza no que foron subtraídas catro garrafas de gasolina. Case dous meses despois, recibíase unha nova denuncia pola subtracción dun taladro, unha bomba de trasvasamento de auga e doce caixas plásticas que contiñan leña.
A finais de ano, a Garda Civil tivo coñecemento dun delito de furto nunha gasolineira da zona, no que unha persoa realizou un repostaxe por importe de 66,01 euros sen efectuar o pagamento. Ademais, detectouse un furto de cable telefónico no termo municipal de Gondomar.
O 24 de decembro, os axentes foron informados da localización das caixas plásticas subtraídas, así como de varios metros de funda de cable telefónico e restos do mesmo, que foran utilizados como combustible nunha grella.
Tras diferentes xestións e pescudas, conseguiuse localizar o punto no que fora vendido o cobre procedente do cable roubado, polo que os autores obtiveran un beneficio económico de 856,80 euros.
Como resultado das actuacións, o día 30 de decembro procedeuse á investigación do home de 25 anos. Posteriormente, o 3 de febreiro, e en colaboración coa Policía Local de Gondomar, localizouse e detívose ao home de 35 anos polos delitos mencionados.
As dilixencias instruídas, xunto co detido, foron postas a disposición da Sección de Instrución do Tribunal de Instancia de Vigo, praza número 2, que decretou a súa liberdade con cargos.