Concello de Nigrán lanza o programa ‘Paseando Nigrán’ con nove roteiros guiados ata fin de ano
O Concello de Nigrán ofrecerá desde este sábado 13 de setembro e ata finais de ano un total de nove roteiros guiados dentro do programa Paseando Nigrán, unha iniciativa que busca promover hábitos de vida saudable ao tempo que permite ás persoas participantes coñecer mellor o termo municipal.
Cada roteiro está publicado na web www.nigran.org, tanto en portada como no apartado Próximos Eventos. As saídas celebraranse sempre os sábados ás 10:00 horas, sendo necesario inscribirse previamente no correo electrónico roteiros@nigran.org, indicando nome, apelidos, teléfono e título ou data da actividade. Ademais, habilítase o teléfono 699 859 418 para resolver dúbidas.
O programa arranca este sábado cun paseo polas praias da localidade (13 de setembro). Entre os roteiros programados destacan clásicos como:
• Península de Monte Lourido (20 de decembro)
• Monteferro (8 de novembro)
• Os pazos do municipio (13 de decembro)
• Río Muíños (4 de outubro)
• Parque forestal Os Matos – Río Táboas (18 de outubro e 15 de novembro)
Tamén se inclúen novidades como:
• Visita aos mosaicos da señora Carmen Souto Vidal na súa casa de Vilariño (20 de setembro)
• Proxecto pictórico “Pintura no lugar” do artista Juan Rivas (29 de novembro)
• Graffities de Beiss 331 en Monteferro (8 de novembro)
“Están deseñados para atraer a todo tipo de público e para gozar en termos xeneralistas do patrimonio máis evidente de Nigrán e tamén do máis escondido ou coñecido”, explicou o alcalde Juan González.