O xove xogador de Nigrán anotou o terceiro gol do partido na súa primeira oportunidade con Hansi Flick

O talento de Nigrán segue dando pasos de xigante. O futbolista Pedro Fernández “Dró”, criado na canteira do Val Miñor, marcou este domingo 27 de xullo o seu primeiro gol co primeiro equipo do FC Barcelona, nun encontro amigable fronte ao Vissel Kobe xaponés, durante a xira asiática de pretempada do club catalán.

Dró, que foi convocado polo novo adestrador Hansi Flick para esta serie de partidos internacionais, aproveitou a súa oportunidade e fixo historia ao anotar o terceiro gol do Barça nun partido que rematou cun claro 3-1 a favor dos blaugranas. O tanto chegou tras un disparo dende a frontal da área, recollendo un despexe da defensa rival e colocando o balón lonxe do alcance do porteiro nipón.

O encontro, disputado en Xapón, serviu como escaparate para novas promesas do club catalán, e o nigranés foi un dos nomes propios da xornada. Os outros dous goles do Barça foron obra de Eric García e Roony Bardghji.

Con só 18 anos, Pedro Dró confirma o seu bo momento e reforza as opcións de seguir sumando minutos co primeiro equipo nesta pretempada.