Entre 1.300 e 2.200 cetáceos morren cada ano en galicia, moitos por captura accidental

A costa do Val Miñor, ao igual que o resto do litoral galego, non é allea ao drama silencioso que viven os cetáceos. Segundo a Coordinadora para o Estudo dos Mamíferos Mariños (CEMMA), cada ano morren entre 1.300 e 2.200 exemplares nas augas galegas, moitos deles por capturas accidentais relacionadas coa actividade pesqueira.

No que vai de ano, Galicia rexistrou o varamento de 200 cetáceos, dos cales o 40% presentan indicios de captura accidental. Desde marzo, a organización Sea Shepherd está a desenvolver unha campaña coa embarcación Walrus para documentar esta problemática, e as imaxes obtidas na operación Dolphin Bycatch confirman a gravidade do impacto pesqueiro na fauna mariña.

A especie máis afectada é o golfiño común, pero tamén se ven prexudicadas outras máis vulnerables, como a toniña, en perigo de extinción. Se ben a maioría dos casos detectados están relacionados co arrastre, tamén hai interaccións con redes de enmalle e caceas de nasas, especialmente no caso das baleas.

Xa en 2003, CEMMA estimou en 1.700 os cetáceos mortos anualmente pola pesca, e os datos actuais suxiren que a cifra se mantén entre 1.300 e 2.200 exemplares cada ano.

Esta información é trasladada regularmente ás administracións estatal e autonómica, insistindo na necesidade de cumprir a lexislación vixente que obriga á notificación de cada captura para ter unha visión máis detallada do problema.